Maribel Iglesias. Xa que estamos sufrindo o primeiro temporal do outono
aproveito para poñer unhas fotografías
de temporais sufridos en Cambados noutras datas.
Corresponde esta foto (supoñemos) a un temporal que trouxo a inundación do paseo da Calzada, esas palmeiras parecen as que están diante do Concello (algo máis pequeñas que as actuais). Ao fondo vese Fefiñáns, e á esquerda o pretil ou “peitoril” do malecón antigo. Aventurándonos a dar unha data podería corresponder aos anos 50, pero non estou moi certa.
Nesta foto é posible ver o antigo malecón que estaba situado á beira da que
hoxe é a Avenida de Galicia. Os recheos posteriores permitiron gañar ao mar
moito terreo no que se construíron entre outras cousas, o Reboredo, a moblería
Leiro, ou o Centro de saúde. Porén
daquela como vemos na foto a avenida de Galicia miraba directamente ao mar. Ao
fondo da foto vese o Concello, a continuación o Cine Cervantes que era antes o
Salón Variedades (hoxe edificio de Mont-Blanc). Por Xoán-Antonio Pillado
sabemos tamén que ao seu carón estaba a casa de Antonio Cuíñas, e no seu baixo
había unha tenda de ultramarinos chamada “el Seguro” e unha fábrica de gaseosas
co mesmo nome. Á dereita de todo está a casa de Elías Porto, armador de barcos.
Moitas destas casas foron derrubadas posteriormente, porén algunas aínda se
conservan hoxe como na que estivo a imprenta Fariña.
Esta foto xa é bastante máis recente, xa existe o paseo novo da Ribeira de
Fefiñáns e aseméllase máis ao que podemos
ver un día coma hoxe en Cambados.
Ata a semana que ven.
No hay comentarios:
Publicar un comentario